Volleyball & Hollywood

Hi Schnallene! 

Ich han grad es wunderbars Wucheendi gha wonich jetzt gern mit eu würd teile. Ahgfange het eigentlich alles demit das mini Host Family id Ferie gange isch. Ich han darum vom Zisitg bis am Sunntig (5 Nächt) bi minere guete Kollegin de Alex gwohnt. Sie spielt im Varsity Volleyball Team und het am Fritig und am Samstig es Turnier gha in Cal City. 
Well Sport in Amerika super wichtig isch laht d'Schuel sogar zueh das die wo Volleyball spielet d'Schuel derfet verlah wenns anes Spiel münd. Darum sind alli Volleyball Spieler und ich am Fritig am Mittag in Bus gsesse und uf Cal City gfahre. 
Cal City isch wükli im nirgendwo usse und wells ebe es zweitägigs Turnier gsie isch hend die meiste Spielerinne im Hotel übernachtet und mir natürlich au. 

Varsity Volleyball Team FMHS Go Falcons

Klicket uf das Bild und ihr gsend Links wie d'Rachel (#1) grad eine vo ihrne super powervolle* spikes anefätzt. Echt fasziniert wie viel Chraft so öper chan ha, vo somene Ball will mer nöd troffe werde. 

* Super Dütsch-Englisch mix Wort

Mini chli Alex 

Jedes Team muss au mal Linierichter mache, de Rachel und de Alex machts uf jedefall Spass

Am Fritig nachem Game hend alli Hunger gha & mer sind mit ere Gruppe go Pizza esse gange. Leider hemmer fast eh Stund uf eusi Pizza müsse warte well alli 25. Teams irgendwie i die glich Pizzeria gange sind. Aber d'Pizza isch schlussendlich defür umso besser gsie!

Linki Site: Ich, Rachel, Alex 

Rechti Site: Mr. Kern, Alex Kern, Maggie, Carissa (Rachel ihri chli Schwöster) 

Im Hotel hemmer denn no eh chlini Party gmacht und öpe 9 Folge vo ridiculousness glueget und glachet bis zum geht nicht mehr. 

Denn am Samstig sind eusi Falcons 5. worde vo 25. Teams gar nöd mal so schlecht. Jedefalls simmer nachem Tunrier no öpis go esse und denn los nach Hollywood gfahre. 

Det acho simmer 10 Minute bevor de Hotel Pool zuegmacht het no in Pool gsprunge und hend spannendi Gspröch mit verschidene Lüt gha. Zu einem wer da en zuekünftige Schriftsteller wo eus vo sim spannende Lebe verzellt het und zum andere en junge Mah wo eifach ungaublich berühemt usgseh het. Uf d'Frag ob er denn berühemt isch hetter gseit "ich wünscht ich wär's" und het sich über sis ach so lute auto beklagt. Ja es isch spannend was mer so für Lüt in Hollywood ahtrifft. 

Am Rockstar sis "lute" Auto

Am Sunntig Morge simmer denn in Starbucks und hend eus es super feins z'Morge gholt (wie's sich halt ghört in Hollywood) und hend eus nacher uf de weg gmacht zum Walk of Fame. 

Hollywood isch öpe so wie ich's mer vorgstellt han eh grossi City mit vielne verrückte und spezielle Mensche. Mir hend euse Spass gha am Walk of Fame.

Ich han mich amigs echli komisch Gfühlt uf d'Sterne druff z'stah well ich gfunde han das isch chli respektslos aber nachere Zit het sich au die lieb Meriel drah gwöhnt, d'Alex het gseit ich het en Egge ab.

Strassekünstler faszinieret mich immer und immer widder. 

Denn hemmer doch no en Star gseh und sini Frau isch sogar au debi gsie. Mickey & Mini 

Kennt das öper vo eu vlt usseme Film? 

Hans voll lustig gfunde det zstah wo ich scho Stars gseh han stah.  

Achtung au shoppe im $5 - Store wird irgendwen tür!

Vo wiiiiitem hemmer denn au s'Sign gseh! 

Nachem Walk of Fame simmer denn nach China-Town gfahre ines ungaublich guets Restaurant go esse und nochli billig go shoppe. 

Nacher hemmer eus denn aus cho uf de Heimweg gmacht. Da d'Alex Country Music mega gern het und mir ah dem weekend mega oft Auto gfahre sind und Musik gloset hend hani jetzt langsam country au gern becho. Und obwohl ich am ahfang gar nöd han möge aber jetzt gits sogar par Songs woni nüme ussem chopf bechume. 

d'Alex am Autofahre

Bim Hei fahre simmer denn no 2 Stunde im Stau gstande aber nöd mal das het das wunderbare Wuchendeni chönne kaputt mache. Für mich isches eis vode beste Wuchendi gsie bist jetzt. Ich bin de Alex und ihrere Familie so dankbar das sie mich mitgnoh hend und mir Hollywood zeiget hend. 

Alles liebi us aMeryca mini Liebe!

Bsuech vode Familie!

Hi Schnalle! 

Ich, Tante Babs und Cousine Sandy

Endlich! Am letschte Sunntig hani Bsuech becho vo minere tolle Tante us de Schwiz und ihrere wunderbare Tochter d'Sandy wo in Santa Monica wohnt. Es isch so schön gsie endlich mal widder schwizerdütsch z'rede mit öperem und sich kei Sorge müsse mache mit "ah was heisst jetzt das Wort" und "ui nei hanis echt richitg usgsproche". Mini Tante het mer au ganz viel Sache us de Schwiz mitbracht wie zum Bispiel Schoggi, Geburi Gschenkli, Aromat und Alltagssache woni nöd han welle neu chaufe. 

Nachdem mer all die schone sache beguetachtet hend simmer den los go Z'Mittag esse imme chline herzige Restaurant in Frazier Park. Mer hend lang lang gredet und es isch eifach so richtig vertraut und wunderbar erholend gsie! 
Nachem Esse hanich ihne mini Schuel zeiget. 

Natürlich au da e Amerika Flagge und dezue no die wunderschöni Kalifornie Flagge

 BEAUTIFUL CALIFORNIA  

Frazier Mountain High School Home of the Falcons

Euses Football Feld wo vor eh par Mönet fast abrennt wär. Hindedrah gseht mer no die verbrennti Erde und Büsch

Nachdem simmer uf PMC ( Pine Mountain Club ) gfahre und hend det no öpis trunke. PMC isch 30 Minute vo Frazier Park eweg und isch eigentlich frühner en reine Ferieort gsie. Mitlerwile hets aber au Lüt wo det wohnet. Es isch wunderschön dete und het ganz viel chlini herzigi Holzhüsli.

Mit de Sandy ihrem Jeep isch d'Fahrt zumene richtige Road Trip worde. 

Umso schöner de Tag umso härter isch de Abschied gsie. Es isch denn leider au scho so wit gsie und ich han mich vo ihne müsse verabschiede. 
Ich han mich so gforit die beide z'gseh und eifach mal en Tag entspanne mit Lüt wo ich mis ganze Lebe kenne. 

Alles Liebi us aMeryca mini Liebe! 
& ah alli wo am Chnabeschüsse und\oder am holi gaudy gsie sind: "Ich bin mega nidisch!" Hoffe ihr hend Spass gha.

10. September - Geburtstag

Hi Schnallene! 

Mini Gasteltere hend mis Zimmer mega herzig dekoriert. 

Ja endlich isches so wit: Min Geburtstag! 

Danke eu allne für die herzige Glückwünsch und Nachrichte und Fotene! 

Mini Model Sista d' Zoe, danke viel mal! 

Es isch lustig gsie zum all eui Glückwünsch scho am Tag vor mim Geburi z'becho (weg de grosse Zitverschiebig) wege dem hani irgendwie 2 Tä Geburtstag gha.

Am Morge hani mit de Zoe und de Nicole skypet bevor ich denn id Schuel bin. Danke Mädels für die liebe Wort! So es unglaublichs Gfühl gsie zum mit eu nach dere lange Zit widdermal z'rede. 

Well mini Gasteltere amigs unter de Wuche nöd so früeh ufstönd wie ich hends mer ihri Gschenkli scho ein Tag vorher geh. 

 Schmuck, Süessigkeite und CHEETOS hends mer gschenkt! 

Und de "chueche" hends für mich mache lah. Er bestaht us ganz vielne Cupcakes.

Ide Schuel ahcho sind die erste Umarmige und Gratulatione cho und ich bin mega überrascht gsie wie viel Lüt drah denkt hend. 

D'Michelle Mullen het mer Guezli mache lah wo meeeeega fein gsie sind.

Danke Michelle!

Ich han 2 mega herzigi Charte becho. Die eint isch vode Jamie und die mit de Sunne isch vom Scott. Er het die Sunne zeichnet und het sogar chli Angst gha das ich ihn uslache defür haha. 

Ide Lunch-Pause het mich d'Alex bim uselaufe vom Klassezimmer is WC zerrt mit de Begründig "I have to tell you something" det hemmer denn gredet und komischerwis het sie sich öpe 5 mal ihri Haar gmacht und mini Chartene welle lese.. denn simmer ussegloffe und ihres komische Verhalte het sich klärt, all mini Kollege sind um euse Senior Tisch gstande mit Ballön und eme Chueche und de ganz Lunchrum het für mich gsunge.

Birebizli peinlich aber mega herzig. 

Vo Links nach Rechts: Rachel, Alex Pivetti, Ich, Celine, Stephanie (obe), Alex Kern, Michelle.

Oh, well mer da in Amerika sind derf die Amerikanischi Flagge natürtlich nöd fähle. Jede wo het welle* het d'Flage signiert und öpis herzigs druff gschriebe. 

*Eh par Lüt hends nämli eh chlini Schand gfunde, die amerikanischi Flagge z'signiere. 

Danke Alex Kern für de mega feini Chueche!  

Nach de Schuel, nachdem mini sportliche Kollege ihres Training beendet hend han ich mich uf de Weg gmacht zu eusem BBQ ide Alex ihrem Hus. 

Jede het öpis chlises mitbracht und ich han sogar no eh par Gschenkli becho. 

Ich han mich mega gfroit über die richtig amerikanische Bächer (WIE IM FILM!) 

Ich danke de ganze Familie Pivetti für de Abig i ihrem Hus!

Nachem Esse simmer denn use in Garte und hend es Für* gmacht und sind alli ums Für ume gsesse. Wie eigentlich immer isch lutstarki Country Musik gloffe und alli hend sich unterhalte und glachet. 

*fast eh ganzi Fläsche Brennflüssigkeit hemmer verbrucht, Amerikanischi Fulheit halt haha. 

Ich, Justin Abell, Alex Oman.

Ich, Seth, Justin Abell, Michelle.

Ich, Alex Pivetti, Justin Abell, Alex Oman.

Denn isch de Moment cho. Sie hend mer "DIE AMERIKANISCHI CAMPFIRE SPEZIALITÄT" zeigt. Es heisst s'more und isch öpis vode beste Sache uf dere wunderschöne Welt. Es heisst so well mer immer "some more" will also: s'more! Was es isch? Da es Bild. 

Das isch es doppeltes S'more, ich persöndlich han nur es einstöckigs gha. Es guets s'more bestaht us emene Kräcker denn es Stück Schoggi und denn es perfekts gröstetes Marshmallow und zum guete Schluss nomal en Kräcker. 

Es isch sooooooo guet! Und soooooo süess!

Alli sind gschockt gsie das ich nonie es s'more gha han und won ich min erste Biss gnoh han hends mich alli miteme gwundrige Blick ahgstahrrt. Es isch so lustig gsie, ich bin so dankbar für de Abig. 

Celine, und die beide "lovebirds" Eric und Sami oder Sameric. 

Dank dene götliche s'mores hemmer leider nöd eis Stück Chueche gesse. Aber nach dem alli gange sind han ich und d'Alex no eh ego Party gmacht und en chueche Fight gha, vo dem Fight gits leider kei Fotene. Aber vom defür Chueche mit ahzündete Cherze. 

Es isch en mega lustige Geburi gsie. Ich bin so froh das ich die Lüt da gfunde han. Es isch so schön mit ihne Zit z'verbringe und sie sind so grosszügig und ahständig und eifach AWESOME! 

Froi mich aber denn min 18. Geburi widder mit eu z'fiere z'chöne. 

Danke für all die Motivation und Chraft wo ihr mir gebet zum die herte Zitä dah durezstah. Es isch nöd immer eifach da, vorallem nöd amene grosse Tag wie eme Geburi. De Gedanke das es de ersti Geburi isch wo ich nöd mit mim geliebte Mami chan fire macht mich trurig aber skype mit ihre hilft. Und wenn öper vo eu je wot skype fröget eifach nach de Adresse. Ich würd mich riesig froie! 

Alles liebi us aMeryca mini Liebe!