First Football Game!

Hi Schnallene! 

Vo links nach rechts: Rachel, Alex Kern, Ich, Alex Pivetti

S'Erste Home Football Game* vom Jahr isch da! Das Game isch immer es grosses Event. Eigentlich wer au en Tanz nachem Game plant gsie doch well mer zwenig Tickets verchauft hend isch de leider abgseit worde. Naja halb so schlimm de nöchst Tanz chunt nemlich scho bald: Homecoming Dance. 

*Home heisst soviel wie es das es nöd uswerts isch sondern uf eusem Schuel-Football Feld. 

Nach de Schuel sind eh par Lüt ide Schuel bliebe und mini Gruppe und ich hend eh tailgate party veranstaltet. Das isch es BBQ (meistens uffeme Parkplatz) voreme Sportspiel. Tönt zimlich unspektakulär isch aber mega lustig und gmüetlich.
De Scott en Kolleg beschriebts so: It's call a tailgate I'm pretty sure haha it's a BBQ before a sports game!! People usually get really drunk hahaha.
Mir hend natürlich nüt trunke aber es isch mega lustig gsie.
Uffem Schuelparkplatz uf de Lafeflächi vomene Truck z'sitze und Zit mit Kollege z'gnüsse macht de Tag um einiges besser.

Linki Site: Thomas, Ich, Alex Oman. Uffem Truck: Alex Pivetti. Rechti Site: Alex Kern, Eric, Riley. Leider gseht mer uffem Foti de Grill nöd.

S'Football Game - Go Falcons!

Rachel und Nummer 4, Thomas Nierhoff

Football Spieler, Cheerleader, und en spektakuläre Sunneuntergang!
Es isch gsie wie im Film. Bevor em Spiel stönd alli uf und d Nationalhymne wird gsunge. Dasmal het es Meitli vo eusere Schuel gsunge aber leider nöd d'Rachel. Sie chan nämli au wunderschön singe und sie wird a eusem Homecoming Spiel singe! Ich hans ganze Spiel mit de Rachel und em Justin und co. glueget und d'Alex Kern und d'Alex Pivetti sind beidi Watergirls gsie. Watergirls stönd am Rand vom Feld und gebet de Spieler Wasser (zimlich selbsterchlärend eigentlich) .

Rachel und ich.

Mir hend gege eh Manschaft namens Einstein Academy* gspielt. Sie münd würcklich chli Einsteins gsie sie, de Punktestand am Endi vom Spiel isch 82 zu 22 für eus gsie, was nöd wük alltäglich isch.
Eusi Cheerleader sind au flissig gsie. Abgseh vo hunderte Tanzihlage weret em Spiel sind sie nach jedem Touch Down füre an Spiel Rand grennt und hend det eh menschlichi Pyramide bildet. Ich han mich gfühlt wie imene Film.

*Ich han probiert zerchläre dases nöd "Einsdein" usgrsproche wird sondern "Einschtein" aber sie hend mer nöd welle glaube.

Es isch so lustig wenn de Sprecher\Moderator durchs Mirkrofon vo Lüt uffem Platz redet wo mer kennt. Wo de Riley zum Bispiel en unglaubliche Lauf vo 99 Yards* gloffe isch hets gheisse:

"Number 10, Riley Daniels had a 99 yard run and made a touch down!!!"

*S'Instagram Video vom Riley, Ich hoffe mer chans ahluege: http://instagram.com/p/d-UPmbRQMN/

Es het aber nöd zellt hani mer erchläre lah:  it did not count because the flags were thrown. Was au immer das widder heisst.

Nachem Spiel simmer no zum Justin sim Hus widermal chli go Sterne ahluege und chli rede. Es isch en guete Abschluss gsie. 

Mis 1. Amerikanische Football Game isch also en grosse Erfolg gsie! Mir hend hochus gwunne und für mich isch en Traum in erfüllig gange. 



Für min leste Post hani so viel positivi Rückmeldige becho, das het mer mega viel neui Motivation geh zum witer z'schriebe! Danke viel mal ihr sind die beste. Es freut mich immer unglaublich z'ghöre das öper min Blogg list! 


Alles liebi us aMeryca und viel Spass am Chnabeschüsse mini liebe!

Labor day - Wuchenendi

Hi Schnallene!

Letscht Weekend hemmer dank em labor day es längers Wuchenendi gha und drum doppelt gnosse!

Am Fritig bin ich und eh Kollegin im Park da in Frazier Park und nacher miteme Kolleg abe uf Bakersfield is Yogurtland. Es isch recht amüsant gsie, obwohl de frozen yogurt eifach nach Glace schmöckt het.

Am Samstig bin ich mit minere Hostfamilie zerst ane Hochzit und den uf Ventura an Strand. Es isch mega schön's Wetter gsie und es sind wuderschöni Bilder entstande.

Ventura Pier 

Min erste California Strandbsuech! 

Am Sunntig bin ich am Namittag zude Alex gfahre worde vo minere Host Family. Ich han mis Züg det abglade und denn simmer mit de Alex und minere Gastfamilie zum Hus vom Justin gfahre, so das mini Gasteltere de Justin kennelerne chönd und mich i sim Auto fahre lönd.
Nachdem alles klärt gsie isch und ich mich vo mine Gasteltere verabschidet han simmer denn los. De Justin isch en erstundlich guete Fahrer und mit de andere isches eh sehr lustigi Fahrt gsie abe nach Valencia.
In Valencia simmer zerst es bizeli id Mall denn in Walmart, ineh Tierhandlig, inen Sportlade und denn endlich zu Sky High was s eigentliche Ziel gsie isch vo eusere Reis. Sky High isch sone Art Trampolino. Mer gummt hauptsächlich uf Trampolin ume aber es git au no Spieli wommer chan mache. Well mer so eh grosses Grüpli gsie sind isches richtig lustig gsie.

Vorem Sky High. Vo Links nach Rechts: Rachel, Seth, Justin, Alex Kern, Eric, Alex Pivetti, Ich, Riley

Nachdem mer stundelang umegumpet sind simmer ines Restaurant go esse und denn widder hei gfahre.
Bevor aber alli hei sind simmer no bi de Alex uffem Trampolin glege und hend ihghüllt i warme Deckene ihghüllt d Sterne beobachtet. Es isch en perfekte Abschluss gise vomene perfekte Tag. Well mer ide berge wohnet sind d Sterne echt mega schön zum ahluege und mer gseht fast all 5 Minute eh Sternschnuppe. Wo denn endlich alli gange sind han ich und d'Alex no en Film glueget und sind denn au is Bett (ich han ah dem Tag bide Alex gschlafe, Sleepover!)


Am Mäntig (Labor Day) simmer früh ufgstande und mit de Alex ihrem Vater an Pyramid Lake gfahre. Det acho simmer sofort ufs Jet-Ski ufgsprunge und los gfahre. Ich bin mer ganz sicher das d Alex mich eh par mal het probiert umzbringe, sie isch gfahre wie eh verruckti aber sie hets voll im Griff gha. Es isch öpis vode beste Sache gsie wo ich i mim Lebe gmacht han. De ganzi Tag am See isch echt mega schön gsie und ich bin de Alex so dankbar das sie mich mitgnoh het.

Das wer mis hammer Wuchenendi gsie, es het mer uf jedefall ghulfe s'Heimweh für eh par Stunde zvergesse und mini Fründschaft zude Alex und co. z'verstärke. Die Gruppe isch echt genial! Sie sind so nett und respektvoll zunenand. Ich bin froh das ich die Lüt han und freu mich scho wennich ghör was sie alles planet mit mier. Chans chum erwarte was mer ah mim Geburi machet.

GO SENIORS!

Alles lidbi us aMeryca, hoffe eu gahts guet.

Frazier Park

Schnallene!

Nach viel Träne und Drama hani endlich Familie gwechselt und wohne jetzt 1h und 14min vo LA entfernt, ide Berge. Es isch es chlises aber herzigs Dörfli, namens Frazier Park. 

Und well Bilder meh als tusig Wörter sehet, da es par Bilder vo mim neue Dihei. 

Mis Hus:

Das süesse Meitli heisst Sally und isch en wichtige Teil vode Familie.

Das sind die zwei Schildchröte vo minere Gastfamilie. 

Ussicht us mim Fenster.

Mini neu Familie het leider kei Chinde, aber ich han mis eigene Zimmer mit eme riesige Bett und eme Balkon und TV. Und sie sind sehr nett und lustig. 

D Schuel isch super es het mega netti Lüt und ich bin en Senior das isch die letschti Klass, das heisst ich chan sone richtigi Amerikanischi Graduation mache!! 

Ich denke ich wird da obe es super Jahr ha. Ich plane scho min Geburtstag mit eh par Kollege vo de Schuel und mir sind eus am überlege ob mer uf LA oder an Strand wend.

Alles alles liebi us aMeryca mini liebe! Vermiss eu alli so fest das chönd er eu gar nöd vorstelle.. Ich het nie denkt das das ganze so schwer wird.. 

Ashlee DeMerritt

Schnallene!

Das isch die chli herzig Ashlee. Ich han die meist Zit da in Newman mit ihre verbracht bis jetzt und darum stell ich sie jetzt schnell vor. 

Name: Ashlee, Ash, Small Girl

Hobbies: Sie spielt oft in Theaterstück mit und spielt Tennis vode Schuel us.

Geburtstag: 27. August 

Wohnort: Newman, ime mega coole Hus mit Pool und ere riesige Musigalag womer im ganze Hus chan stüre. 

Lieblings Film: Lion King 

Random fact: Sie besitzt eh riesigi Sammlig mit allne alte Disney Film.

Vo wo ich sie kenne: Sie kennt mini Gastfamilie und isch eus darum 1 Tag nachdem mer ahcho sind go bsueche. 

Warum sie? : Sie isch eifach en wahre Schatz. Scho vom 1. Tag ah hani mit ihre über alles chöne rede und mit ihre lache. Sie gseht d Welt sehr ähnlich wie ich und mir hend au sust viel gmeinsam. Bi ihre fühli mi immer wohl. Sie spielt gern spieli wie "Cruiser bruiser" und isch au sust es bizeli crazzy aber das isch okay, darum lieb ich sie. 

1. Schueltag - Orestimba High School

Schnallene!

Schuelfarbe: Violett und Gold 
Ahzahl Schüeler: 695 
Maskottchen: Indiens

De ersti Schueltag anere richtige amerikanische High School isch so schnell verbi gange. S wunderliche isch, dases wük öpe so isch wies ide Film immer dargstellt wird. 
Es gid d'Nerds, d'Sportler, die wo sich bide Lehrer ischleimet und natürlich d'Cheerleaders. 


Ich bin en Junior und somit ide 2. eltsiste Stufe. Es git nämli 4. Stufe. Freshman, Sophomor, Junior, Senior.

Funny Facts about the Orestimba High School: 

- es git 3 Meitli wo schwanger sind uf eusere Schule

- Die meiste cheerleaders datet wie ide Film so schön dargstellt en Typ usem football team. 

- Wells Schuel esse so grusig isch fahret eh par Lüt über Mittag de ganz weg bis zum nöchste Mcdonalds zum ihres Esse det chaufe und esset denn ide 1. Stund am Namittag

- Juniors und Seniors hend unterschieldichi Mittagszite wie Freshman und Sophomor well die eltere sust die chline würdet mobbe und i Mülltonnene stecke und so Sache mache

- Es git en Lehrer de heisst Mr. Jeans und well es sehr sehr viel spanisch sprechendi Schüeler da het nennet ihn alli nur Señor Pantalones

Es isches riese ghetz gsie bis mir endlich euse Stundeplan gha hend. Mer hend sogar die ganzi ersti Stund verpasst. Und ganz am Ahfang vode erste Stund stönd alli uf mit de Hand ufem Herz und seget es Treue-Gelöbnis. Es heisst Pledge of Allegiance und gaht so:


"I pledge allegiance to the Flag of the United States of America, and to the Republic for which it stands, one Nation under God, indivisible, with liberty and justice for all." http://www.youtube.com/watch?v=52dfJnLkEd4

Als Nöd-Amerikaner staht mer eifach mit uf us Respekt,  mer muss aber nöd mitrede. 

D Klasse wechslet bi jedem neue Fach und es chan au guet sie das mer i par Fächer mit jüngere oder eltere Schüeler isch. 

Min Stundeplan: 

1st Period, Art and Ideas (oder eifach male), Layne
Hani Hüt ebe leider nonig chöne bsueche und weiss darum nonig wies isch.

2nd Period English 11, Blankenship

Eh sehr netti aber au strikti Lehrerin. Wells de ersti Tag gsie sich hemmer vorallem so Sache wie Regle und Konsequenze besproche. Ich han sogar scho öper kennt ide Klass und zwar d Franziska. Sie isch au eh Ustuschschüelerin und chunt vo Dütschland. 

3rd Period, Spanish 1, Gil

I dere Klass sind vorallem jüngeri Schüler wells die eifachsti Spanischklass isch wos het. D'Lehrerin d'Señora Gil isch sehr streng und lacht nie. Sie redet sehr lieslig und mit ere chalte Stimm und ich denke es isch sehr schwer bi ihre eh gueti Note zmache. Eigentlich het sie die ganz Stund nur ufzellt für was mer alles bestraft werde chan. Leider kenni no niemert i dere Klass. 

4rd Period, Algebra 1, Chaidez

Au i dere Klass sinds vorallem jüngeri Schüeler. D' Frau Chaidez isch ganz neu uf dere Schuel und het würklich eh par lustigi Regle. Wenn mer zum bispil ufs WC muss, muss mer sich noimets ihträge und sich es Schild mit eme WC-Mann-Frau-Symbol umhenge und es Baby-WC uf sin Tisch lege. Erst wenn das alles gmacht isch derf mer gah. Sie würkt aber sehr frisch und nett und sie het au scho gseit das sie nöd viel Ufzgi wird geh, was sie grad no chli sympathischer macht. 

5th Period, US History, Candelario

Endlich mal eh Klass wo alli glich alt sind wie ich. De Lehrer würkt sehr fründlich und d Klass isch jetzt irgendwie scho ihgspillt. Und es het au öper woni kenn und zwar de Sam. I dere Klass hani de Christian kenneglernt wo sich mega nett bi mir vorgstellt het. 

6th Period<><><><><><><><><>LUNCH<><><><><><><><><>

Alli wo Senior oder Junior sind derfet jetzt go esse gah. S Esse isch leider (wie ide meiste Film) zum chotze aber es isch gratis. 

7th Period, Chemistry, Van Rys

Da chönt mer meine ide 2. letschte Stund bevor Schuelus isch chönts eh nüme schlimm werde, doch das chans vorallem wemmer d'Frau Van Rys in Chemie hät. Sie isch witus die fragwürdigsti Lehrerin vo allne. Als aller erstes het sie eus vo ihrem Sohn verzellt wo ide Army isch. Sie het eus gseit das er eus mit blose Händ töte chönt. Sie het eus au verzellt das er s'Bootcamp als beste Schüeler absolviert het und und und. Ich und de Rest vode Klass wüssed alli nöd genau warum genau sie eus das verzellt het aber ich han es par verwunderti Gsichter gseh ide Klass. Als nöchstes het sie eus eh Wasserfläsche präsentiert mit eme Ufsatz wommer chan demit umesprütze und sie het eus au zeigt wie wit sie demit chunt. Wenn ihre also öper ufd Nerve gaht chan sie mit dere Fläsche ihn oder sie eifach nass sprütze wie bime chline Chätzli. Zum schluss het sie eus no alli bite das mer viel lernet für das Fach mit de Begründig "Gott hät Lüt wo nöd lernet nöd gern". 

Mit Abstand die fragwürdigsti Lehrerin aber trotzdem lieb ich ihre Unterricht well ich det mit de Franziska (Ustuschschüelerin vo Dütschland), mit dem Christian (neue Bekannte vom Geschichtsunterricht)  und mit de Ashlee bin. 

8th Period, Ceramic/Sculpting, Stearns

Endlich! Die letscht Stund vom Tag und denn no so eh chilligi. Es isch echt eh riesigi Klass. Es het Schüeler vo allne Altersstufene. D'Frau Stearns isch mega nett und sie erinneret mich ebizeli ad Sybill Trelawney* vo Harry Potter.

*Bild vode Sybille Trelawney

Ich ja eigentlich welle Volleyball go spiele doch im muss mer das nomal überdenke. Ich han d'Wichtigkeit vom Sport in Amerika würklich unterschätzt. S Volleyball Training wer jede Tag nach de Schuel 2 Stund lang und denn chömet no zuesätzlich 2 Stunde Ufzgi vode Schuel dezue. Denn bliebt eim gar kei Zit meh zum öpis anders mache. Wahrschindlich warti zerst mal ab und spiele denn mit de Ashlee Tennis oder so. 

Danke viel mal ah all die wo sich de Tag gmerkt hend und mer viel Glück gwünschd hend und alles liebi us aMERYca!

Ich vermisse s'Bryant Camp!

Schnallene!

Go Bryant!!!!

Obwohl ich das Camp am ahfang total scheisse gfunde han und eifach han welle zu minere Gastfamilie wünsch ich mer jetzt so sehr das ich no det wär!

Ich vermisse so Moment wie de. Wommer eus eifach Pizza uf de Campus bstellt hend wells Esse det so grusig gsie isch..

Oder euse geile Tag in Boston mit de langwiligste Stadtbesichtigungstour ever!

Hahaha ich weiss vo wo die 2 Kilo chömet.. jede Morge Speck und Rüehrei + Öpis Süesses isch eifach zvill!

Skate ide United Skate of America isch au es hammer Erlebnis gsie. Und obwohl mer geg die Jungs vo Schwede verlore hend im Laser Tag isches super gsie.

Doch s wichtigste & s schönste am Camp sind die internationale Fründschafte wo gschlosse worde sind.

Die Best Klass und  die beste Volleyball players! 

KENNEDY VICTORY!

Das isch echt geil gsie!

Vermiss eu.

Alles liebi us

aMeryca!

Endlich da!

Hi mini Schnallene!

Nach 10 Täg Bryant Camp in Boston isches endlich so wit und ca. 450 EF Schüeler vo Länder wie Norwege, Dänemark, Italie, Spanie, Japan, Korea, Taiwan, Schwede, Schwiz, Dütschland und Östrich verteilet sich i 50 Staate und startet is wahrschindlich beste Jahr vo ihrem Lebe. 

Mich und eh 15 jährigi Japanerin tribts uf Newman im wunderschöne Staat Californie!

Mir beide chömet i die glich Familie well mir beidi eme sogenannte double placement zuegstimmt hend.

Nach eusem 7 stündige Flug uf San Francisco chömmers chum abwarte endlich eusi Gastfamilie ztreffe aber zerst mümmer nomal eh halbstund miteme winzige Flugzüg meh is Landesinnere flüge. 

Det ahcho empfangt eus eusi Gastfamilie total herzlich mit Plakat und vielne Umarmige! 

Sie sind sehr sehr netti Lüt mit viel Humor. 

Doch wommer denn bim Hus ahcho sind isch die "böse Überraschig" da gsie.

S Hus isch winzig. Es het 1 Badzimmer für 5 Persone und das Zimmer vo mir und de Sumire (uffem 1. Bild) isch sogar no chliner als mis Zimmer dihei! 

Es isch zwar schön ihgrichtet und so aber leider würkli sehr sehr winzig.

Ich wohn jetzt scho sit em Samstig da (Hüt isch Mäntig) & ich denke immer nonig das ich mich ah die grössi gwönne chan.

Vorallem fallts mir sehr schwer es Zimmer zteile.. 

Ich han kein Ort wo ich mich chan zruggzieh und eifach mal es Stündli für mich allei sie & mit öperem vo eu skype oder so.. das isch wük sehr sehr schwär.

Newman hät vlt öpe knapp 10'000 Iwohner und isch somit zwar grösser als Hedige aber für Amerika trotzdem no winzig. Ich & d'Sumire (so heisst d Japanerin) sind jetzt scho 2mal eifach chli go umelaufe und chli go luege was es da so het. 

Es het wük nöd viel. Nöd mal en Lade wo mer sich en Computer chan chaufe. 

Es isch wükli winzig und irgendwie chan jede Spanisch.

Eusi High School gseht defür us wie ussem Film aber d'Schuel fangt ja zum Glück erst am 12. August ah.

Dummerwies chumi mit de Sumire nöd wük guet us mir redet fast keis Wort und hengets eifach immer nur nebetenand im Zimmer. & d'Familie isch so nett das de Muet nöd finde ihne zsege das ich mich nöd wohl fühle da. 

Ich lueg jetzt mal ide nöchste Täg wies sich entwicklet doch ich muss leider sege dass ich mer nöd chan vorstelle das ich es Jahr da wohne.. vlt. mussi doch mal drüber nahdenke d'Famile zwechsle. 

Usserdem bini s erste mal i mim Lebe richtig richtig Homesick!

Ich vermiss eu alli unglaublich!! :( 

Ganz viel Küss und Umarmige us 

aMeryca mini Schnallene!!!