Mery's Schnalletagebuech : The happiest place on earth!

Hi Schnallene!

Ich hans Glück gha das mich im Februar eh sehr gueti Kollegin vo mir go bsueche cho isch. Mir hend eh super Zit gha uf euere Los Angeles Tour und vom "happiest place on earth" wemmer eu gern en chline Ihblick geh.

WELCOME TO DISNEYLAND

"the happiest place on earth"

Uf welli Bahn gaht mer als Schwizer natürlich zerst? - Matterhorn Bobsleds

d'Joelle vorem "Matterhorn"

Eh recht rasanti Bahn wo mer sich als Schwizer fast scho chli wie Dihei fühlt. Ob mer de Sicherheitsgurt au richtig ah het, checkt es Fräulein innere altmodische Tracht.

Mir sind amene Zitstig gange und es hät darum gar nöd so viel Lüt gha. S'längste was mer ahstande sind isch 40 Minute gsie und sust hemmer eigentlich recht viel Glück gha.

Mini Lieblingsbahn isch und bliebt d'Pirates of the Caribbean. Es isch richtig schön gmacht mit Liebi zu jedem Detail und hin und wieder gseht mer en Jack Sparrow hinderem Rumfass füregüggsle. Au d'Jötti isch begeisterte gsie vo dere Bahn. Bi dere magische Atmosphäre wo mer gespührt wenn mer i dem Boot sitzt und de Piratealltag beobachtet, wird mer gar nöd bös wemmer bi dene zwei "Drops" wo d'Bahn beinhaltet, echli nass wird.

Mit "Yo ho, yo ho, a pirate's life for me" no im Chopf simmer denn eus de Weg dur de Park go sueche und uf anderi magische Bahne wie Peter Pan's Flight, eh Bahn wommer imene flügende Pirateschiff abhebt und über London us is Neverland flügt. Atemberaubend und unglaublich traumhaft.
Nachdem han ich d'Joelle chöne überrede mit mir is Haunted Mansion Hus z'cho. Grusel! Grusel! Zum eus vo dem Schreck z'erhole simmer den uf eh Star Tour — The Adventures Continue. Obwohl mer sich uf de öpe 7 minütige Fahrt nöd vom Fleck bewegt isches eh überraschend gueti Fahrt imene Rumschiffsimulator. Sogar bim ahstah gseht mer scho sehr viel spannende Sache und wird vo sprechende Roboter unterhalte. Uf die nöchst Bahn hemmer denn grad 2 mal müsse. Space Mountain isch eh rasanti Bahn in dunkle wo d'Joelle und ich vergliche würdet mit de Eurosat im Europapark. Zum eus echli z'entspanne simmer denn uf The Many Adventures of Winnie the Pooh und ufs Mark Twain Riverboat, es Boot wo um de chlini See fahrt für 15 Minute. Anderi Bahne womer no druff sind wäret: Buzz Lightyear Astro Blasters womer gegenand eh Art Laser Tag, d'Mad Tea Party wo wie immer awesome isch.

Aber nebet Bahne het s'Disneyland au no vieles anderes z'büte. Hundertusigi verschideni Stores mit herzige Artikel vo dim Lieblings-Disneyfigur und lustige Gadgets. Und well mer da ja in Los Angeles, California sind wo alles sehr troche isch und mer nebet Palmene nöd sehr viel grüens gseht (unser mer gaht uf Beverly Hills) sind au die verschidene Pflanze sehr schön zum aluege.

Churs bevor mer denn au scho wieder hend müsse gah, simmer uf'd
Indiana Jones™ Adventure und well mer no Zit gha hend und mer gar nöd het müsse ahstah, simmer au da no es zweits mal gange. Und denn eusi letscht Bahn isch d'Jungle Cruise gsie. Au wenns nur Plastik Tierli und fake exotischi Pflanze sind fühlt mer sich wie im Jungle… es bizeli wenigstens.

Und das wer euse Trip gsie an "happiest place on earth" wer mal ide nöchi vo eim isch (Paris, Orlando oder ebe Los Angeles) söt unbedingt mal gah!