D'Ferie sind schowider ume und abem Mäntig gahts widder id Schuel. Es froit sich glaubs niemert so richtig aber wenigstens hemmer eh schöni Zit gha und spannendi Festtäg.
D'Amerikaner firet Wiehnachte am 25. Dezember und am 24. Dezember firets sogenannte Christmas Eve. Am 24. simmer darum all zemme id Chile gange für eh wunderschöni festlichi Mäss. Am nöchste Morgen (Oh Wunder!) isch de Santa cho und het ganz viel Gschenkli bracht. Delaney het mich und d'Sami am 6i am Morge ufgweckt zum euse "Stocking" ufzmache. Das isch en überdimensionale Socke wo mit chlinere Gschenk gfüllt isch. Nachdem mer de ufgmacht hend hemmer müsse warte bis de Rest vode Familie ufwachet. Ich hans Recht komisch gfunde well ich han nonie Gschenk amene Morge ufgmacht aber es isch au irgendwie lässig gsie und halt richtig Amerikanisch.
Ich han es Footie Pajama becho und ganz viel anderi Sache wonich mich riesig drüber gfroit han. D'Familie het sich au super über d'Schwizer Sackmesser und d'Swatch Uhre gfroit.
Denn nur wenigi Täg spöter nach mim Trip zu minere Cousine uf LA isch denn au scho Silvester gsie. Well d'Grosseltere uf Bsuech cho sind han ich und d'Sami müsse ide Delaney ihrem Zimmer schlafe. Ah Silvester isch denn widder d'Familie Omen uf bsuech cho und mir (d'Kids) hend eus überleit was mer mache söttet. Nach chli Ahfangsschwierigkeite isches denn zumene richtig guete Abig worde. Mir hend es Fürli gha vor eusem Hus und wärend "die Erwachsnige" dine gsie sind, sind ganz unerwarted mega viel Kollege vo eus uftaucht und ums Für gsesse ich glaube es sind ohni eusi Autos öpe 15 Fahrzüg vor eusem Hus gstande. Nachdem mer denn im Fernseh gseh hend wie de "Ball dropped" simmer mit all dene Autos chli umegfahre und hend chli Fürwerk abglah. Es isch wahrschindlich eis vo mine ruhigere Silvester gsie aber au eis vode beste. En super start ines neues Jahr ufjedefall!
Happy New Year Schnallene!
ah spätzli, freu mich mega für dich, dass es dir so gfallt det äne..
AntwortenLöschenund nur no 28 täg bis ich dich gsehn!! :)) :**