Halloween

Hi Schnallene!

Es isch Halloween gsie und da in Amerika isch das grösser als sust noimets. Alles het ahgfange am Morge wo mer ufgwacht isch und sich anstatt normali Schuelchleidig es Kostüm überzoge het und id Schuel isch. 

 In Amerika gahts eigentlich nöd drum wie gruselig mer sich verkleidet. Die meiste Lüt verchleidet sich eifach lustig oder sexy. Ich han grusel und lustig irgendwie kombiniert und bin denhalt "death Super Girl" gsie. Ja, mis Kostüm isch so chli zu mim Halloween Dilema worde. Scho Wuche vor Halloween hani mer nämlich überleit als was ich gah will und ich han mich fürs Amerikanischte entschide was mer  in Sinn cho sich: Wonder Women. Aber das Kostüm hät die liebi Firma leider erst am Halloween Abig bracht und so hani müsse es anders Kostüm für d'Schuel finde.

 Aber denn bim Volleyball Game nach de Schuel isches denn au endlich acho. Nachem Volleyball Game simmer alli nach Pinon Pines gange go "Trick or Treating". Eigentlich isch mer mit 17i viel zalt für das und das weiss da au jede, aber alli machets irgendwie no gern und ich gseh nöd i was schlimm drah isch well, hei wer seit scho nei zu gratis Candy!
Ich han sogar bi eim Hus es Schwizer Lindor chugle becho.
Die meiste Hüser sind fantastisch dekoriert gsie. Chürbis, Grabstei, Gspängster, Zombies und und und. Während mer so durs Dorf gloffe isch isch mer immer widder bekannte Gsichter begägnet.

 Au mini Gastfamilie het s'Hus dekoriert und en Tag vor Halloween het jede vo eus Pumpkin carved.

De Cody (min Host Brüeder) am sin 20$ Chürbis schnitze

Eusi schöni Cürbis Familie! 

Und das isch min gruselige Chürbis 

Wommer so dur Pinon Pines gloffe sind und eus übers beste Kostüm unterhalte hend isch plötzlich en Mah mit Maske und ere Chetesägi usem Nüt gsprunge und eus nahgrennt. Ich hans so nöd erwartet und drumm bini au richtig verschrocke, aber es isch uh lustig gsie und ich glaube mer chan das Video jetzt uf Youtube ahluege. Am Endi vom Abig simmer denn no schnell is Auto ghüpft und zude Alex gfahre well sie nämlich es Lagerfür gha het und eh par Lüt ihglade het. 

Und s'beste Kostsüm vo Tag het sicherlich de Taco gha, en Bueb us Kanada wo sich selber allne als Taco vorstellt (au wenns nöd Halloween sich).

Viel Süessigkeite, viel fun und wenig Schlaf. Am nöchste Tag simmer sehr sehr spat erst id Schuel gange. De Direktor isch aber froh gsie und het eus gseit das er glücklich isch das mer überhaupt cho sind well nur 45% vode Schüeler da sind. Halloween isch so viel grösser da, ich glaube ich muss jetzt jedes Jahr uf Amerika cho nur scho für Halloween würds sich's uf jede Fall lohne.  Wie isch eues Halloween gsie? 

Alles Liebi us aMeryca mini Liebe!