Bsuech vode Familie!

Hi Schnalle! 

Ich, Tante Babs und Cousine Sandy

Endlich! Am letschte Sunntig hani Bsuech becho vo minere tolle Tante us de Schwiz und ihrere wunderbare Tochter d'Sandy wo in Santa Monica wohnt. Es isch so schön gsie endlich mal widder schwizerdütsch z'rede mit öperem und sich kei Sorge müsse mache mit "ah was heisst jetzt das Wort" und "ui nei hanis echt richitg usgsproche". Mini Tante het mer au ganz viel Sache us de Schwiz mitbracht wie zum Bispiel Schoggi, Geburi Gschenkli, Aromat und Alltagssache woni nöd han welle neu chaufe. 

Nachdem mer all die schone sache beguetachtet hend simmer den los go Z'Mittag esse imme chline herzige Restaurant in Frazier Park. Mer hend lang lang gredet und es isch eifach so richtig vertraut und wunderbar erholend gsie! 
Nachem Esse hanich ihne mini Schuel zeiget. 

Natürlich au da e Amerika Flagge und dezue no die wunderschöni Kalifornie Flagge

 BEAUTIFUL CALIFORNIA  

Frazier Mountain High School Home of the Falcons

Euses Football Feld wo vor eh par Mönet fast abrennt wär. Hindedrah gseht mer no die verbrennti Erde und Büsch

Nachdem simmer uf PMC ( Pine Mountain Club ) gfahre und hend det no öpis trunke. PMC isch 30 Minute vo Frazier Park eweg und isch eigentlich frühner en reine Ferieort gsie. Mitlerwile hets aber au Lüt wo det wohnet. Es isch wunderschön dete und het ganz viel chlini herzigi Holzhüsli.

Mit de Sandy ihrem Jeep isch d'Fahrt zumene richtige Road Trip worde. 

Umso schöner de Tag umso härter isch de Abschied gsie. Es isch denn leider au scho so wit gsie und ich han mich vo ihne müsse verabschiede. 
Ich han mich so gforit die beide z'gseh und eifach mal en Tag entspanne mit Lüt wo ich mis ganze Lebe kenne. 

Alles Liebi us aMeryca mini Liebe! 
& ah alli wo am Chnabeschüsse und\oder am holi gaudy gsie sind: "Ich bin mega nidisch!" Hoffe ihr hend Spass gha.

10. September - Geburtstag

Hi Schnallene! 

Mini Gasteltere hend mis Zimmer mega herzig dekoriert. 

Ja endlich isches so wit: Min Geburtstag! 

Danke eu allne für die herzige Glückwünsch und Nachrichte und Fotene! 

Mini Model Sista d' Zoe, danke viel mal! 

Es isch lustig gsie zum all eui Glückwünsch scho am Tag vor mim Geburi z'becho (weg de grosse Zitverschiebig) wege dem hani irgendwie 2 Tä Geburtstag gha.

Am Morge hani mit de Zoe und de Nicole skypet bevor ich denn id Schuel bin. Danke Mädels für die liebe Wort! So es unglaublichs Gfühl gsie zum mit eu nach dere lange Zit widdermal z'rede. 

Well mini Gasteltere amigs unter de Wuche nöd so früeh ufstönd wie ich hends mer ihri Gschenkli scho ein Tag vorher geh. 

 Schmuck, Süessigkeite und CHEETOS hends mer gschenkt! 

Und de "chueche" hends für mich mache lah. Er bestaht us ganz vielne Cupcakes.

Ide Schuel ahcho sind die erste Umarmige und Gratulatione cho und ich bin mega überrascht gsie wie viel Lüt drah denkt hend. 

D'Michelle Mullen het mer Guezli mache lah wo meeeeega fein gsie sind.

Danke Michelle!

Ich han 2 mega herzigi Charte becho. Die eint isch vode Jamie und die mit de Sunne isch vom Scott. Er het die Sunne zeichnet und het sogar chli Angst gha das ich ihn uslache defür haha. 

Ide Lunch-Pause het mich d'Alex bim uselaufe vom Klassezimmer is WC zerrt mit de Begründig "I have to tell you something" det hemmer denn gredet und komischerwis het sie sich öpe 5 mal ihri Haar gmacht und mini Chartene welle lese.. denn simmer ussegloffe und ihres komische Verhalte het sich klärt, all mini Kollege sind um euse Senior Tisch gstande mit Ballön und eme Chueche und de ganz Lunchrum het für mich gsunge.

Birebizli peinlich aber mega herzig. 

Vo Links nach Rechts: Rachel, Alex Pivetti, Ich, Celine, Stephanie (obe), Alex Kern, Michelle.

Oh, well mer da in Amerika sind derf die Amerikanischi Flagge natürtlich nöd fähle. Jede wo het welle* het d'Flage signiert und öpis herzigs druff gschriebe. 

*Eh par Lüt hends nämli eh chlini Schand gfunde, die amerikanischi Flagge z'signiere. 

Danke Alex Kern für de mega feini Chueche!  

Nach de Schuel, nachdem mini sportliche Kollege ihres Training beendet hend han ich mich uf de Weg gmacht zu eusem BBQ ide Alex ihrem Hus. 

Jede het öpis chlises mitbracht und ich han sogar no eh par Gschenkli becho. 

Ich han mich mega gfroit über die richtig amerikanische Bächer (WIE IM FILM!) 

Ich danke de ganze Familie Pivetti für de Abig i ihrem Hus!

Nachem Esse simmer denn use in Garte und hend es Für* gmacht und sind alli ums Für ume gsesse. Wie eigentlich immer isch lutstarki Country Musik gloffe und alli hend sich unterhalte und glachet. 

*fast eh ganzi Fläsche Brennflüssigkeit hemmer verbrucht, Amerikanischi Fulheit halt haha. 

Ich, Justin Abell, Alex Oman.

Ich, Seth, Justin Abell, Michelle.

Ich, Alex Pivetti, Justin Abell, Alex Oman.

Denn isch de Moment cho. Sie hend mer "DIE AMERIKANISCHI CAMPFIRE SPEZIALITÄT" zeigt. Es heisst s'more und isch öpis vode beste Sache uf dere wunderschöne Welt. Es heisst so well mer immer "some more" will also: s'more! Was es isch? Da es Bild. 

Das isch es doppeltes S'more, ich persöndlich han nur es einstöckigs gha. Es guets s'more bestaht us emene Kräcker denn es Stück Schoggi und denn es perfekts gröstetes Marshmallow und zum guete Schluss nomal en Kräcker. 

Es isch sooooooo guet! Und soooooo süess!

Alli sind gschockt gsie das ich nonie es s'more gha han und won ich min erste Biss gnoh han hends mich alli miteme gwundrige Blick ahgstahrrt. Es isch so lustig gsie, ich bin so dankbar für de Abig. 

Celine, und die beide "lovebirds" Eric und Sami oder Sameric. 

Dank dene götliche s'mores hemmer leider nöd eis Stück Chueche gesse. Aber nach dem alli gange sind han ich und d'Alex no eh ego Party gmacht und en chueche Fight gha, vo dem Fight gits leider kei Fotene. Aber vom defür Chueche mit ahzündete Cherze. 

Es isch en mega lustige Geburi gsie. Ich bin so froh das ich die Lüt da gfunde han. Es isch so schön mit ihne Zit z'verbringe und sie sind so grosszügig und ahständig und eifach AWESOME! 

Froi mich aber denn min 18. Geburi widder mit eu z'fiere z'chöne. 

Danke für all die Motivation und Chraft wo ihr mir gebet zum die herte Zitä dah durezstah. Es isch nöd immer eifach da, vorallem nöd amene grosse Tag wie eme Geburi. De Gedanke das es de ersti Geburi isch wo ich nöd mit mim geliebte Mami chan fire macht mich trurig aber skype mit ihre hilft. Und wenn öper vo eu je wot skype fröget eifach nach de Adresse. Ich würd mich riesig froie! 

Alles liebi us aMeryca mini Liebe! 

First Football Game!

Hi Schnallene! 

Vo links nach rechts: Rachel, Alex Kern, Ich, Alex Pivetti

S'Erste Home Football Game* vom Jahr isch da! Das Game isch immer es grosses Event. Eigentlich wer au en Tanz nachem Game plant gsie doch well mer zwenig Tickets verchauft hend isch de leider abgseit worde. Naja halb so schlimm de nöchst Tanz chunt nemlich scho bald: Homecoming Dance. 

*Home heisst soviel wie es das es nöd uswerts isch sondern uf eusem Schuel-Football Feld. 

Nach de Schuel sind eh par Lüt ide Schuel bliebe und mini Gruppe und ich hend eh tailgate party veranstaltet. Das isch es BBQ (meistens uffeme Parkplatz) voreme Sportspiel. Tönt zimlich unspektakulär isch aber mega lustig und gmüetlich.
De Scott en Kolleg beschriebts so: It's call a tailgate I'm pretty sure haha it's a BBQ before a sports game!! People usually get really drunk hahaha.
Mir hend natürlich nüt trunke aber es isch mega lustig gsie.
Uffem Schuelparkplatz uf de Lafeflächi vomene Truck z'sitze und Zit mit Kollege z'gnüsse macht de Tag um einiges besser.

Linki Site: Thomas, Ich, Alex Oman. Uffem Truck: Alex Pivetti. Rechti Site: Alex Kern, Eric, Riley. Leider gseht mer uffem Foti de Grill nöd.

S'Football Game - Go Falcons!

Rachel und Nummer 4, Thomas Nierhoff

Football Spieler, Cheerleader, und en spektakuläre Sunneuntergang!
Es isch gsie wie im Film. Bevor em Spiel stönd alli uf und d Nationalhymne wird gsunge. Dasmal het es Meitli vo eusere Schuel gsunge aber leider nöd d'Rachel. Sie chan nämli au wunderschön singe und sie wird a eusem Homecoming Spiel singe! Ich hans ganze Spiel mit de Rachel und em Justin und co. glueget und d'Alex Kern und d'Alex Pivetti sind beidi Watergirls gsie. Watergirls stönd am Rand vom Feld und gebet de Spieler Wasser (zimlich selbsterchlärend eigentlich) .

Rachel und ich.

Mir hend gege eh Manschaft namens Einstein Academy* gspielt. Sie münd würcklich chli Einsteins gsie sie, de Punktestand am Endi vom Spiel isch 82 zu 22 für eus gsie, was nöd wük alltäglich isch.
Eusi Cheerleader sind au flissig gsie. Abgseh vo hunderte Tanzihlage weret em Spiel sind sie nach jedem Touch Down füre an Spiel Rand grennt und hend det eh menschlichi Pyramide bildet. Ich han mich gfühlt wie imene Film.

*Ich han probiert zerchläre dases nöd "Einsdein" usgrsproche wird sondern "Einschtein" aber sie hend mer nöd welle glaube.

Es isch so lustig wenn de Sprecher\Moderator durchs Mirkrofon vo Lüt uffem Platz redet wo mer kennt. Wo de Riley zum Bispiel en unglaubliche Lauf vo 99 Yards* gloffe isch hets gheisse:

"Number 10, Riley Daniels had a 99 yard run and made a touch down!!!"

*S'Instagram Video vom Riley, Ich hoffe mer chans ahluege: http://instagram.com/p/d-UPmbRQMN/

Es het aber nöd zellt hani mer erchläre lah:  it did not count because the flags were thrown. Was au immer das widder heisst.

Nachem Spiel simmer no zum Justin sim Hus widermal chli go Sterne ahluege und chli rede. Es isch en guete Abschluss gsie. 

Mis 1. Amerikanische Football Game isch also en grosse Erfolg gsie! Mir hend hochus gwunne und für mich isch en Traum in erfüllig gange. 



Für min leste Post hani so viel positivi Rückmeldige becho, das het mer mega viel neui Motivation geh zum witer z'schriebe! Danke viel mal ihr sind die beste. Es freut mich immer unglaublich z'ghöre das öper min Blogg list! 


Alles liebi us aMeryca und viel Spass am Chnabeschüsse mini liebe!

Labor day - Wuchenendi

Hi Schnallene!

Letscht Weekend hemmer dank em labor day es längers Wuchenendi gha und drum doppelt gnosse!

Am Fritig bin ich und eh Kollegin im Park da in Frazier Park und nacher miteme Kolleg abe uf Bakersfield is Yogurtland. Es isch recht amüsant gsie, obwohl de frozen yogurt eifach nach Glace schmöckt het.

Am Samstig bin ich mit minere Hostfamilie zerst ane Hochzit und den uf Ventura an Strand. Es isch mega schön's Wetter gsie und es sind wuderschöni Bilder entstande.

Ventura Pier 

Min erste California Strandbsuech! 

Am Sunntig bin ich am Namittag zude Alex gfahre worde vo minere Host Family. Ich han mis Züg det abglade und denn simmer mit de Alex und minere Gastfamilie zum Hus vom Justin gfahre, so das mini Gasteltere de Justin kennelerne chönd und mich i sim Auto fahre lönd.
Nachdem alles klärt gsie isch und ich mich vo mine Gasteltere verabschidet han simmer denn los. De Justin isch en erstundlich guete Fahrer und mit de andere isches eh sehr lustigi Fahrt gsie abe nach Valencia.
In Valencia simmer zerst es bizeli id Mall denn in Walmart, ineh Tierhandlig, inen Sportlade und denn endlich zu Sky High was s eigentliche Ziel gsie isch vo eusere Reis. Sky High isch sone Art Trampolino. Mer gummt hauptsächlich uf Trampolin ume aber es git au no Spieli wommer chan mache. Well mer so eh grosses Grüpli gsie sind isches richtig lustig gsie.

Vorem Sky High. Vo Links nach Rechts: Rachel, Seth, Justin, Alex Kern, Eric, Alex Pivetti, Ich, Riley

Nachdem mer stundelang umegumpet sind simmer ines Restaurant go esse und denn widder hei gfahre.
Bevor aber alli hei sind simmer no bi de Alex uffem Trampolin glege und hend ihghüllt i warme Deckene ihghüllt d Sterne beobachtet. Es isch en perfekte Abschluss gise vomene perfekte Tag. Well mer ide berge wohnet sind d Sterne echt mega schön zum ahluege und mer gseht fast all 5 Minute eh Sternschnuppe. Wo denn endlich alli gange sind han ich und d'Alex no en Film glueget und sind denn au is Bett (ich han ah dem Tag bide Alex gschlafe, Sleepover!)


Am Mäntig (Labor Day) simmer früh ufgstande und mit de Alex ihrem Vater an Pyramid Lake gfahre. Det acho simmer sofort ufs Jet-Ski ufgsprunge und los gfahre. Ich bin mer ganz sicher das d Alex mich eh par mal het probiert umzbringe, sie isch gfahre wie eh verruckti aber sie hets voll im Griff gha. Es isch öpis vode beste Sache gsie wo ich i mim Lebe gmacht han. De ganzi Tag am See isch echt mega schön gsie und ich bin de Alex so dankbar das sie mich mitgnoh het.

Das wer mis hammer Wuchenendi gsie, es het mer uf jedefall ghulfe s'Heimweh für eh par Stunde zvergesse und mini Fründschaft zude Alex und co. z'verstärke. Die Gruppe isch echt genial! Sie sind so nett und respektvoll zunenand. Ich bin froh das ich die Lüt han und freu mich scho wennich ghör was sie alles planet mit mier. Chans chum erwarte was mer ah mim Geburi machet.

GO SENIORS!

Alles lidbi us aMeryca, hoffe eu gahts guet.